আৰ্হি প্রশ্ন

(ক) অতি চমু প্রশ্ন (প্ৰতিটো প্রশ্নৰ মূল্যাংক- ১)

১। দেৱকান্ত বৰুৱা অসমীয়া কাব্য জগতত কি কবি হিচাপে জনাজাত?
উত্তৰ: দেৱকান্ত বৰুৱা অসমীয়া কাব্য জগতত ‘দোমোজাৰ কবি’ আৰু আধুনিক অসমীয়া কবিতাৰ ‘দুৱাৰ মুকলি কৰোঁতা’ হিচাপে জনাজাত।

২। দেৱকান্ত বৰুৱাৰ একমাত্র কাব্যপুথিখনৰ নাম কি?
উত্তৰ: দেৱকান্ত বৰুৱাৰ একমাত্র কাব্যপুথিখনৰ নাম হ’ল ‘সাগৰ দেখিছা’।

৩। দেৱকান্ত বৰুৱাৰ কোনটো কবিতাত প্ৰথমে আধুনিকতাৰ প্ৰতিধ্বনি শুনা যায়?
উত্তৰ: দেৱকান্ত বৰুৱাৰ ‘আমি দুৱাৰ মুকলি কৰোঁ’ কবিতাত প্ৰথমে আধুনিকতাৰ প্ৰতিধ্বনি শুনা যায়।

৪। ‘দেশৰ বাতৰি শুনিবানে বীৰ’- ইয়াত বীৰ বুলি কাৰ কথা কোৱা হৈছে?
উত্তৰ: ইয়াত বীৰ বুলি আহোম সেনাপতি লাচিত বৰফুকনৰ কথা কোৱা হৈছে।

৫। ‘নৰ শোণিতেৰে কৰিলা আৰতি দেশৰ জয়শ্রীৰ’- জয়শ্রী মানে কি?
উত্তৰ: জয়শ্রী মানে শত্ৰুক পৰাজয় কৰাৰ পৰা হোৱা সৌভাগ্য বা মান।

(খ) চমু প্রশ্ন (প্ৰতিটো মূল্যাংক-২ অথবা ৩)

১। দেৱকান্ত বৰুৱাৰ কবিতাত কোনগৰাকী ইংৰাজ কবিৰ কবিতাৰ প্ৰভাৱ দেখা যায়? সেই ইংৰাজ কবিগৰাকীৰ কাব্যিক শৈলীক কি শৈলী বুলি কোৱা হয়?
উত্তৰ: দেৱকান্ত বৰুৱাৰ কবিতাত ইংৰাজ কবি ৰবাৰ্ট ব্রাউনিঙৰ কবিতাৰ প্ৰভাৱ দেখা যায়।
সেই ইংৰাজ কবিগৰাকীৰ কাব্যিক শৈলীক ‘নাটকীয় স্বগতোক্তি’ বুলি কোৱা হয়।

২। ইব্রাহিম কোন আছিল? তেওঁ কি বীৰত্ব প্ৰদৰ্শন কৰিছিল?
উত্তৰ: ইব্রাহিম বা আব্রাহম বাইবেল আৰু কোৰানত উল্লেখ থকা এজন ঈশ্বৰৰ দূত বা নবী।
তেওঁ নিজৰ পুত্ৰ ইছমাইলক কোৰবাণি দিবলৈ প্ৰস্তুত হৈছিল, কাৰণ ঈশ্বৰে সপোনত তেওঁক তেনে কৰিবলৈ আদেশ দিছিল।
এই ত্যাগৰ পৰীক্ষাই তেওঁৰ বীৰত্ব প্ৰদৰ্শন কৰিছিল।

৩। ‘অসমৰ এই কাম্যভূমিত চৰিছে গাধৰ পাল’- ইয়াত গাধৰ পাল বুলি কবিয়ে কাক বুজাইছে?
উত্তৰ: ইয়াত কবিয়ে গাধৰ পাল বুলি সেইসকল মানুহক বুজাইছে যিসকলে লাচিত বৰফুকনৰ দৰে পূৰ্বপুৰুষৰ বীৰত্ব পাহৰি গৈছে। তেওঁলোকে কেৱল পেট পুহিবলৈ আনৰ পিছত লৰে আৰু নিজৰ আত্মসন্মান হেৰুৱাইছে। এই মানুহবোৰ বোজা বৈ বৈ দুৰ্বল হৈ পৰিছে, কিন্তু তেওঁলোকে নিজৰ দুৰৱস্থাৰ প্ৰতি কাণসাৰ নিদিয়ে।

৪। ‘হে অসমৰ ত্যাগৰ মূৰ্তি! মাতুল-ঘাতক-নবী’- ইয়াত কাক কিয় মাতুল ঘাতক নবী বুলি কৈছে?
উত্তৰ: ইয়াত লাচিত ফুকনক ‘মাতুল-ঘাতক-নবী’ বুলি কোৱা হৈছে।
তেওঁ নিজৰ মোমায়েকক দেশৰ বাবে হত্যা কৰিছিল, যাৰ বাবে তেওঁক ‘মাতুল-ঘাতক’ বুলি কোৱা হৈছে। ইব্রাহিমৰ দৰে তেৱোঁ নিজৰ দেশৰ মুক্তিৰ বাবে কঠোৰ ত্যাগ কৰিছিল, যিটো এজন নবীৰ দৰে মহান ত্যাগ আছিল।

৫। দেশ জননীৰ পূজাৰ কেনে আয়োজন দেখি ‘মুক্তি পলাল’ বুলি কবিয়ে কৈছে?
উত্তৰ: কবিয়ে দেশ জননীৰ পূজাৰ ‘অদ্ভুত আয়োজন’ দেখি ‘মুক্তি পলাল’ বুলি কৈছে। এইসকল নকল-নবীছৰ দলে পিয়ানো বজাই, মমৰ বাতি জ্বলাই মুক্তি যুদ্ধ কৰিছে। এইবোৰ ভুৱা দেশপ্ৰেমৰ কাৰ্যকলাপ।

(গ) দীঘল প্রশ্ন (প্ৰতিটো মূল্যাংক-৪ অথবা ৫)

১। ‘লাচিত ফুকন’ কবিতাটিত কেনেধৰণৰ চিন্তা কৰ্মই সমাজ ব্যৱস্থা সোলোক-ঢোলোক কৰিছে বুলি কোৱা হৈছে?
উত্তৰ: ‘লাচিত ফুকন’ কবিতাটোত কবিয়ে কেতবোৰ চিন্তা-কৰ্মৰ কথা কৈছে যিয়ে সমাজৰ ব্যৱস্থা সোলোক-ঢোলোক কৰিছে। কবিয়ে কৈছে যে সমাজৰ মানুহে নিজৰ মৌলিকতা আৰু স্বকীয়তা হেৰুৱাইছে। তেওঁলোকে নিজৰ অতীত পাহৰি গৈছে আৰু বিদেশী সংস্কৃতিৰ নকল কৰিছে। এই নকল-নবীছৰ দলে পিয়ানো আৰু মমবাতি জ্বলাই দেশৰ মুক্তি বিচাৰিছে। আনফালে, দেশৰ মানুহে কানিৰ মূল্য নিৰূপণ কৰাত, আৰু মৰ-আঁউসীত হাল বালে কেই ধেনু পৰাচিত হ’ব লাগে ইত্যাদি অর্থহীন কৰ্মৰ বিচাৰ কৰাত ব্যস্ত। এই অন্ধ ৰীতি-নীতিবোৰ আৰু অৰ্থহীন চিন্তা-চৰ্চাই সমাজৰ ব্যৱস্থা কোঙা কৰি পেলাইছে।

২। ‘লাচিত ফুকন’ কবিতাটিত কবিয়ে কেনেধৰণৰ দেশপ্রেমক ভুৱা দেশপ্রেম বুলি কৈছে?
উত্তৰ: কবিতাটোত কবিয়ে কেইবাটাও ধৰণৰ ভুৱা দেশপ্ৰেমৰ বিষয়ে কৈছে। প্ৰথমতে, তেওঁ পিয়ানো বজাই, মমবাতি জ্বলাই পূজাৰ দৰে অদ্ভুত আয়োজন কৰি মুক্তি বিচাৰা নকল-নবীছ দলক ব্যংগ কৰিছে। তেওঁ এইটোও কয় যে ভুৱা স্বদেশপ্ৰেমৰ কোবাল সোঁতত দেশ টলমল হৈ পৰিছে। এইসকল মানুহে কেৱল বক্তৃতা দি আকাশ কঁপায় আৰু টেটু ফালি চিঞৰে, কিন্তু কামৰ ক্ষেত্ৰত তেওঁলোকে বাঁহৰ কামীত চুণ সানি ৰণছালি ধৰে। তেওঁলোকে বছৰি বছৰি লাচিতৰ দৰে বীৰৰ স্মৃতি সভা পাতে, কিন্তু ভিতৰি নিজৰ স্বাৰ্থৰ বাবে, যেনে আবগৰী দাৰোগাৰ চাকৰি বিচাৰি হাবাথুৰি খায়। এই ধৰণৰ দেশপ্ৰেমক তেওঁ ভুৱা দেশপ্ৰেম বুলি কৈছে।

৩। ‘লাচিত ফুকন’ কবিতাটোত কবিয়ে ‘দেশৰ বাতৰি শুনিবানে বীৰ’ বুলি কৈ কি কি বাতৰি দিছে?
উত্তৰ: কবিতাটোত কবিয়ে ‘দেশৰ বাতৰি শুনিবানে বীৰ’ বুলি কৈ লাচিত ফুকনক বৰ্তমানৰ অসমৰ দুখজনক পৰিস্থিতিৰ বিষয়ে জনাব বিচাৰিছে। তেওঁ লাচিতক কৈছে যে তেওঁৰ অসমৰ চিন-চাব নাইকিয়া হৈছে আৰু ‘লুইতৰ এই বিশাল পাৰত নাই আৰু অসমীয়া’। ইয়াৰ পৰিৱৰ্তে, ইয়াত কেৱল ‘গাধৰ পাল’হে আছে, যিয়ে এমুঠি দানাৰ বাবে আনৰ পিছত লৰে। তেওঁ কৈছে যে আনফালে, ‘নকল-নবীছ দল’ পিয়ানো বজাই আৰু মমবাতি জ্বলাই দেশৰ মুক্তি আনিব বিচাৰিছে। তেওঁ এইটোও কৈছে যে দেশখন স্বদেশপ্ৰেমৰ কোৱাল সোঁতত টলমল হৈছে, কিন্তু মানুহে ভিতৰি অন্ধ ৰীতি-নীতিৰ কবলত পৰি সমাজ ব্যৱস্থা কোঙা কৰি পেলাইছে।

৪। ‘লাচিত ফুকন’ কবিতাটিৰ মাজেৰে কবিৰ স্বদেশপ্ৰেম কিদৰে পৰিস্ফুট হৈছে আলোচনা কৰা।
উত্তৰ: ‘লাচিত ফুকন’ কবিতাটোৰ মাজেৰে দেৱকান্ত বৰুৱাৰ গভীৰ স্বদেশপ্ৰেম প্ৰকাশ পাইছে। তেওঁ প্ৰথমে আহোম সেনাপতি লাচিতৰ মহান ত্যাগ আৰু বীৰত্বৰ কথা সুঁৱৰি তেওঁৰ প্ৰতি গভীৰ শ্ৰদ্ধা নিবেদন কৰিছে। তেওঁ আক্ষেপেৰে কয় যে আজিৰ অসমীয়া সমাজে অতীতৰ গৌৰৱ পাহৰি গৈছে। তেওঁৰ ক্ষোভ আৰু হতাশাৰ কাৰণ হ’ল যে দেশৰ মানুহে নিজৰ স্বকীয়তা বাদ দি নকল কৰিছে আৰু সৰু সৰু স্বাৰ্থৰ বাবে হাবাথুৰি খাইছে। কিন্তু ইয়াৰ মাজতো কবিয়ে আশাৰ সঞ্চাৰ কৰিছে। তেওঁ বিশ্বাস কৰে যে লাচিতৰ সাহস আজিও এচাম ডেকাৰ তেজত প্ৰবাহিত হৈ আছে, যি এজন সাহসী সেনাপতিৰ হুকুম পালেই স্বদেশ ৰক্ষাৰ বাবে লুইতৰ বগা পানী ৰঙা কৰি তুলিব পাৰে। এই হতাশাজনক পৰিস্থিতিৰ মাজতো দেশৰ প্ৰতি থকা বিশ্বাস আৰু আস্থাই কবিৰ স্বদেশপ্ৰেম প্ৰকাশ কৰিছে।